Na mañá do 9 de maio a Subdelegación do Goberno en Ourense abría as súas portas a un cento de persoas de diversos colectivos para dar a coñecer tanto as súas instalacións como os servizos e a actividade que desenvolve a Administración Xeral do Estado na provincia. Esta iniciativa enmárcase na Semana da Administración Aberta, coa que se pretende reunir xornadas de portas abertas e outro tipo de eventos en torno a un mesmo fío condutor, os principios do goberno aberto: transparencia, participación, rendición de contas e colaboración.
O subdelegado do Goberno, Roberto Castro, recibía aos asistentes a esta xornada de portas abertas e manifestaba que “como vén sendo habitual as actividades do Goberno e da Administración Pública deben estar abertas a tódolos niveis posibles para o escrutinio e a supervisión de tódolos cidadás da provincia”. E destacaba que “unha das miñas primeiras teimas dende que asumín esta responsabilidade foi a de ensanchar as portas e ventás da Administración a toda cidadanía sen trabas nin exclusións”.
Separados en pequenos grupos, pasaban por cada departamento: Información e Rexistro, Unidade de Violencia contra a Muller, Autorizacións Administrativas, Protección Civil, Infracións Administrativas, Xurado Provincial de Expropiación Forzosa, Traballo e Inmigración e Estranxeiría. Os seus responsables fóronlles dando conta das funcións de cada un deses departamentos e dos servizos que prestan. Nalgún caso, tamén lle expuxeron exemplos prácticos de xestión de expedientes e tramitación de recursos.
Encadrada dentro das acción de formación, sensibilización e educación do Terceiro Plan de Goberno Aberto de España, esta xornada dá resposta ademais a unha iniciativa que se está impulsando a nivel mundial pola Alianza para o Goberno Aberto, da que España forma parte. O Goberno aberto contempla un conxunto de mecanismos que contribúen á gobernanza Pública e bo goberno, baseado nos alicerces de transparencia, participación cidadá, rendición de contas, colaboración e innovación, incluíndo na cidadanía no proceso de toma de decisións así como na implementación de políticas públicas. As actividades celebranse en todo o territorio español a iniciativa tanto das distintas administracións públicas como da sociedade civil e outros interesados.
Fotos: Subdelegación do Goberno en Ourense.
