Un outono máis o Concello da Veiga desenvolve actividades no marco do proxecto “Tregumelos” de posta en valor micolóxica do municipio. En outubro tiñan xa lugar dúas xornadas formativas, que incluían saídas ao monte, os días 16 e 18 de outubro coa participación en total dunhas 40 persoas.
Así o 16 de outubro impartíase unha charla didáctica e de carácter introdutorio ao mundo da micoloxía a cargo de Borja Mínguez, propietario dunha explotación de cultivo de cogomelos en Celanova. De seguido, realizábase unha saída técnica.
Dous días despois, o 18 de outubro, Borja Mínguez e Ricardo Mínguez ofrecían unha nova charla didáctica xa máis centrada no cultivo de Pleorotus ostreatus e Agaricus bisporus, aínda que tamén se falou sobre cogomelos comestibles e se fixo tamén unnha saída ao monte, seguida de identificación e clasificación dos que teñen un valor culinario e daqueles outros que son tóxicos.
As xornadas completaranse cunha nova sesión, desta volta, o 8 de novembro na Biblioteca Pública-Centro TIC da Veiga.
Máis información na edición en papel do Periódico O Sil.
Fotos: Concello da Veiga