Co obxectivo de “chamar a atención sobre o valor dos conxuntos da arquitectura popular da zona, pedir ás institucións públicas que axuden á súa convervación e ao mesmo tempo animar aos peregrinos que os visiten”, segundo as palabras da presidenta da Asociación Camiños a Santiago pola Ribeira Sacra, Aida Menéndez, as XII Xornadas do Camiño de Inverno celebradas na fin de semana do 12 e 13 de setembro, xiraron en torno a dúas localidades do sur da provincia de Lugo: Ribas de Sil e Quiroga.
Tal como explica a propia Aida, na xornada do sábado as 60 persoas incritas percorreron un tramo do Camiño de Inverno entre San Clodio e Quiroga con visita á igrexa románica de San Clodio e conferencia sobre arquitectura popular a cargo de Juan Ortiz, profesor na Universidade de Santiago de Compostela.
O domingo, malia a chuvia que descargou en toda Galicia, a xornada levaría aos camiñantes a facer un percorrido polo Caurel, descubrindo e admirando lugares como a aldea rehabilitada de A Seara, a Fervenza de Vieiros, ou o Miradoiro da Devesa de Rogueira, entres outros, tendo a oportunidade de degustar platos da gastronomía típica do Caurel na Casa Rural de Paderme. Xa de regreso, polo Incio, os asistentes visitaron a igrexa románica de San Pedro de Fiz de Hospital, “contando co excepcional guía Guillermo Diaz Aira”, puntualiza Aida, asegurando que foi todo un éxito de participación.