A Consellería do Medio Rural comezou hai uns días os contactos para levar a cabo a última quenda do traspaso de parcelas do Banco de Terras a concellos de toda Galicia. Hoxe, 10 de xaneiro, foi a quenda de Ourense. O director xeral da Axencia Galega de Desenvolvemento Rural, Miguel Pérez Dubois, trasladouse á delegación provincial para manter un encontro cos responsables dos municipios que poderán beneficiarse desta nova transferencia para explicarlles que predios son susceptibles de recibir para o seu uso veciñal e o proceso a seguir.
En concreto, o portavoz de Medio Rural reuniuse cos representantes de: Xunqueira de Ambia, Xunqueira de Espadañedo, Castrelo do Val, Cualedro, Monterrei, Oímbra, Verín, Bande, Muíños, O Carballiño, Esgos, San Cibrao das Viñas e A Veiga. Entre todos os concellos hai 107 parcelas susceptibles de ser de titularidade municipal.
Estes terreos poderá pasar a ser dos Concellos grazas á Lei de mellora da estrutura territorial agraria de Galicia (Metaga), que permite que os predios sen utilidade agraria pasen a ser directamente do concello dun xeito máis áxil e con menos carga burocrática que a tradicional cesión que se viña realizando ata o de agora.
De feito, non é a primeira vez que se formaliza un traspaso deste tipo. En total, no 2017 a Consellería do Medio Rural formalizou o cambio de titularidade de 1.234 parcelas a 37 concellos e o obxectivo é chegar á revisión duns 2.500 terreos que forman parte do catálogo de terras pero que non poden ser arrendados a agricultores e gandeiros.
