O director do Igape, Juan Cividanes, salientou hoxe nun almorzo informativo, organizado pola Asociación de Jóvenes Empresarios de Ourense (AJE), o catálogo de servizos e axudas habilitado pola Xunta, ao abeiro da Lei do Emprendemento, para facilitar a posta en marcha, o crecemento e a consolidación de novas empresas. O director do Igape subliñou que a Consellería de Economía, Emprego e Industria ofrece unha completa e diversa batería de instrumentos de apoio para atender ás necesidades dos emprendedores, “sexa cal sexa a fase de desenvolvemento dos proxectos ou as súas empresas”.
Cividanes destacou, neste senso, que o programa Galicia Emprende, dotado este ano de 5 millóns de euros, “é un instrumento preparado para apoiar a creación de novas empresas e o desenvolvemento de compañías de recente creación”. O programa Galicia Emprende regula a concesión de apoios ata 175.000 euros para a posta en marcha ou a consolidación temperá de empresas impulsadas por autónomos e emprendedores, facilitando así a xeración de emprego.
As solicitudes ao abeiro da primeira convocatoria do Programa Galicia Emprende poden presentarse até o 20 de xuño, e irá seguida doutras dúas convocatorias que se abrirán o 30 de xuño e o 20 de outubro, respectivamente, para facilitar a preparación de proxectos. Este ano, a Xunta prevé apoiar deste xeito máis de 200 proxectos novos.
Cividanes recordou que a Xunta, a través de Xesgalicia, dispón igualmente de fondos de capital risco como Galicia Iniciativas Emprendedoras ou i2C, preparados para apoiar especialmente os proxectos innovadores dos novos emprendedores. Tamén citou a Rede de Busines Angels, como instrumento de cofinanciamento privado, e a Rede Galega de Mentores, como servizo importante para que os emprendedores poidan consolidar os seus proxectos contando coa experiencia altruísta de xestores expertos ou emprendedores consolidados.
