Unhas 3.000 persoas dábanse cita na mañá do 16 de xuño, no parque municipal do Carballiño, para asistir á XL Xuntanza dos Maiores, a maior afluenza a esta reunión dos últimos anos coa chegada de 65 autobuses procedentes de centros sociocomunitarios e concellos de toda Galicia.
Entre os asistentes ao evento festivo de confraternidade estaba o conselleiro de Política Social, José Manuel Rey Varela; a directora xeral de Maiores e Persoas con Discapacidade, Fabiola García; e a delegada territorial en Ourense, Marisol Díaz Mouteira, e parte da corporación municipal do Carballiño co alcalde Francisco Fumega, ademais doutros responsables da Administración autonómica.
A programación do festexo, presentado por Roberto Vilar e Eva Iglesias, do programa da TVG “Land Rober” incluíu ademais do tradicional xantar, unha exhibición coreográfica, animación musical e baile, prolongándose durante boa parte da xornada de tarde. Tamén se recoñeceu o labor dos centros sociocomunitarios de Fene (A Coruña), Vilalba (Lugo) e Ponte Pelamios (Ourense), así como de José Piñeiro, da Asociación Galega de Pensionistas (Asogapen).