Na mañá do 18 de xullo clausurábase do XI Curso de Medios Audiovisuais de Celanova titulado “O audiovisual galego: 25 anos de presente”, que contou coa presenza do conselleiro de Cultura, Educación e Ordenación Universitaria, Xesús Vázquez Abad.
Na cuarta e última xornada deste encontro, que tiña lugar no Auditorio Ilduara de Celanova, participaba asemade o director da Axencia Galega das Industrias Culturais (AGADIC), Jacobo Sutil, que compartiu con representantes do sector unha mesa redonda para abordar o tema “Onde está e cara a onde vai o audiovisual galego”. Logo, os alumnos de Comunicación Audiovisual proxectaron o cuarto e último capítulo da web serie “O interfecto” no marco do taller audiovisual “Celanova, plató de ficción”.
O curso remataba coa a entrega de diplomas por parte do titular do departamento de Cultura e Educación e o director do curso, Miguel Anxo Fernández. No acto tamén estiveron presentes, o delegado da Xunta na provincia, Rogelio Martínez; o presidente da Fundación Carlos Casares, Javier Casares; e o alcalde de Celanova, José Luís Ferro.
Como un curso de verán de extensión universitaria, a actual edición desenvolveuse ao longo de catro xornadas, nas que tivo un protagonismo especial a longametraxe e a súa versatilidade actual, así como os formatos e xéneros máis alternativos e de baixo custe. En referencia ao lema deste ano, lembráronse ademais as tres películas realizadas en 1989 coas que se iniciou a andaina do cinema en galego: “Urxa”, “Continental” e “Sempre Xonxa”.
Dende o martes 15 de xullo ata o día de hoxe, o XI Curso de Medios Audiovisuais de Celanova acolleu xornadas intensivas nas que se trataron diferentes temas centrados no panorama audiovisual galego. Así, ponse fin a esta undécima edición que foi organizada pola Fundación Carlos Casares, a Universidade de Vigo a través da Vicerreitoría do Campus de Ourense, a Deputación de Ourense e o Concello de Celanova; e contou coa colaboración da AGADIC, da Televisión de Galicia e da Facultade de Ciencias Socias e de Comunicación de Pontevedra.
