Ata nove compañías de teatro de monicreques de diferentes puntos de Galicia e Portugal, así como agrupacións de cabezudos e xigantes procedentes de varias localidades galegas e lusas, estarán presentes dende mañá martes 24 de xuño e ata o sábado 28 (en plenas festas do Corpus), nas prazas e rúas da cidade, para participar na primeira edición do Encontro de títeres, xigantes e cabezudos de Ourense, un festival pioneiro en Galicia, dirixido ao público infantil, adulto e familiar, “co que se pretende recuperar a tradición dos bonecos nas festas populares” tal como e xplican dende o Concello ourensán.
As funcións de monicreques durante os cinco días, en horario de mañá e de tarde nos Xardíns de Padre Feijóo e de Bispo Cesáreo, correrán a cargo dos grupos galegos Títeres Mircromina, Marionetas Trécola, Fantoches Baj, Larraitz Urruzola e Títeres Cascanueces; e dos grupos portugueses Filandorra Teatro do Nordeste, Cia Fio d’Azeite, S.A. Marionetas Teatro & Bonecos e Títeres.
O sábado 28 de xuño, terá lugar o encontro de xigantes e cabezudos. A recepción está prevista para as 10h. na Alameda do Concello, onde tamén haberá instalados xogos populares para os máis pequebos. Pola tarde terá lugar o desfile, con saída dende a Alameda e chegada ao Parque de San Lázaro percorrendo a Avenida de Pontevedra e as rúas Lamas Carvajal e do Paseo.
No encontro participarán xigantes e cabezudos procedentes dos concellos galegos de Ourense, Xinzo de Limia, O Barco de Valdeorras, Allariz e Celanova; e “gigantones” e bombos dos concellos portugueses de Braga, Palmela e Vila Real. Como recordo do festival, tódolos participantes recibirán unha estatuíña do “Bocas” (o personaxe ideado por Eduardo Blanco Amor para “A Esmorga” ) deseñada polo titiriteiro e escultor Luis Iglesias “Luchi”.
O encontro Bonecos do Atlántico “nace en Ourense neste 2014 para recuperar e poñer en valor esta tradición, co obxectivo de que volten os xigantes e cabezudos a desfilar polas vilas acompañados das funcións dos bonecos máis pequenos, os monicreques” conclúen dende o Concello.
