Os veciños de Oval (Rubiá) ultiman os preparativos do que é unha das súas festas máis multitudinarias: a Convivencia nas Adegas. A cita, que o ano pasado reunía a unhas 1.300 persoas, cumpre xa seis edicións nas que o bo viño, os pinchos e sobre todo un ambiente moi especial e animado son os seus principais reclamos.
Desta volta esta singular ruta festiva terá lugar o 16 de agosto a partires das 19:30h. da tarde. Prévese que nesta edición serán unhas 14 adegas as que abrirán as súas portas a público. O prezo da taza ou entrada será de 9 euros e a cambio os participantes poderán degustar “bo viño, variedade de pinchos, ademais de moita festa con charangas” e xa como fin de festa unha discoteca móbil.
Esta VI Convivencia nas Adegas de Oval (Rubiá) será organizada, un ano máis, pola Asociación de Veciños de Adegas de Oval.
Foto: Carlos G. Hervella
(Máis información na edición en papel do Periódico O Sil).